ಕೃಷ್ಣೇಗೌಡರ ಪರ ಧ್ರುವಸರ್ಜಾ ಅಬ್ಬರದ ರೋಡ್ ಶೋ; ಮುಗಿಲು ಮುಟ್ಟಿದ ಜೈಕಾರ

ಅರಕಲಗೂಡು: ಅರಕಲಗೂಡು ವಿಧಾನಸಭಾ ಕ್ಷೇತ್ರದಲ್ಲಿ ಚಿತ್ರನಟ ಧ್ರುವಸರ್ಜಾ ಸೋಮವಾರ ರೋಡ್ ಶೋ ನಡೆಸಿ ಪಕ್ಷೇತರ ಅಭ್ಯರ್ಥಿ ಎಂ.ಟಿ. ಕೃಷ್ಣೇಗೌಡರ ಪರ ಭರ್ಜರಿ ಮತಬೇಟೆ ನಡೆಸಿದರು.

ಹಳ್ಳಿಮೈಸೂರು ಹೋಬಳಿ ಶ್ರವಣೂರು ಗ್ರಾಮದಲ್ಲಿ ಚಿತ್ರನಟ ಧ್ರುವಸರ್ಜಾ, ಅಭ್ಯರ್ಥಿ ಎಂ.ಟಿ. ಕೃಷ್ಣೇಗೌಡ,  ಮುಖಂಡರಾದ ದಿವಾಕರ ಗೌಡ ಅವರು ಕ್ರಾಂತಿವೀರ ಸಂಗೊಳ್ಳಿ ರಾಯಣ್ಣ ಪುತ್ಥಳಿಗೆ ಬೃಹತ್ ಮಾಲಾರ್ಪಣೆ ಮಾಡಿ ರೋಡ್ ಶೋಗೆ ಚಾಲನೆ ನೀಡಿದರು.

ಹಳ್ಳಿಮೈಸೂರು ಹೋಬಳಿಯಲ್ಲಿ ನಡೆಸಿದ ರೋಡ್ ಗೆ ಜನರಿಂದ ಅಭೂತಪೂರ್ವ ಬೆಂಬಲ ದೊರೆಯಿತು.

ಶ್ರವಣೂರು, ದೊಡ್ಡಹಳ್ಳಿ, ಹಳ್ಳಿಮೈಸೂರು, ಓಡನಹಳ್ಳಿ, ಗುಬ್ಬಿ, ಬಿದರಕ್ಕ, ಕೇರಳಾಪುರ ಗ್ರಾಮದಲ್ಲಿ ಧ್ರುವಸರ್ಜಾ ಅವರೊಂದಿಗೆ ಅಭ್ಯರ್ಥಿ ಎಂ.ಟಿ. ಕೃಷ್ಣೇಗೌಡ ಅವರು ತೆರೆದ ವಾಹನದಲ್ಲಿ ನಿಂತು ಪ್ರಚಾರ ಕಾರ್ಯ ನಡೆಸಿ ಮತ ಯಾಚಿಸಿದರು. 

ರೋಡ್ ಶೋ ಬೆಂಬಲಿಸಿ ಕೃಷ್ಣೇಗೌಡ ಅವರ ಅಭಿಮಾನಿಗಳು ಬೈಕ್ ರ್ಯಾಲಿ ನಡೆಸಿ ಗಮನ ಸೆಳೆದರು. ರೋಡ್ ಶೋ ಮಾರ್ಗದುದ್ದಕ್ಕೂ ಧ್ರುವಸರ್ಜಾ ಅವರು ಕೃಷ್ಣೇಗೌಡ ಅವರಿಗೆ ಮತ ಕೇಳುವ ಮುಖೇನ ಸಿನಿಮಾ ಡೈಲಾಗ್ ಗಳನ್ನು ಹೇಳಿ ಜನರನ್ನು ಹುರುದುಂಬಿಸಿದರು. ಜನರು ಶಿಳ್ಳೆ ಕೇಕೆ ಹಾಕಿ ಅದ್ದೂರಿಯಾಗಿ ಸ್ವಾಗತಿಸಿದರು.

ಹಲವಾರು ವರ್ಷಗಳಿಂದ ಜನಸೇವೆ ಮಾಡಿಕೊಂಡು ಜಾತ್ಯಾತೀತವಾಗಿ ಜನಪರ ಕಾರ್ಯಗಳಿಗೆ ಸಹಕಾರ ನೀಡಿದ್ದೇನೆ. ರಾಜಕೀಯ ಪಕ್ಷಗಳಿಗಿಂತ ಜನಬೆಂಬಲ ಮುಖ್ಯ. ಕ್ಷೇತ್ರದ ಅಭಿವೃದ್ಧಿಯೇ ನನ್ನ ಮುಂದಿರುವ ಗುರಿ. ಇದಕ್ಕೆ ಜನರ ಆಶೀರ್ವಾದ ಕೇಳಲು ಬಂದಿರುವೆ. ಮತದಾರರು ಚುನಾವಣೆಯಲ್ಲಿ ನನಗೆ ಮತಬಿಕ್ಷೆ ನೀಡಬೇಕು ಎಂದು ಮನವಿ ಮಾಡಿದರು.

ಮಳೆ ಅಡ್ಡಿ: ಕೇರಳಾಪುರದಲ್ಲಿ ರೋಡ್ ಶೋ ವೇಳೆ ಭಾರಿ ಮಳೆ ಸುರಿಯಿತು. ಮಳೆಯ ಕಾರಣ ಧ್ರುವಸರ್ಜಾ ಅವರು ಮುಂದಿನ ಗ್ರಾಮಗಳಲ್ಲಿ ನಡೆಯುವ ರೋಡ್ ಶೋಗಳಲ್ಲಿ ಪಾಲ್ಗೊಳ್ಳಲಿಲ್ಲ. ಧ್ರುವಸರ್ಜಾ ಅವರ ಅನುಪಸ್ಥಿತಿಯಲ್ಲಿ ರಾಮನಾಥಪುರ, ಕೊಣನೂರು ಭಾಗದಲ್ಲಿ ಅಭ್ಯರ್ಥಿ ಕೃಷ್ಣೇಗೌಡ ಅವರು ತಮ್ಮ ಬೆಂಬಲಿಗರೊಂದಿಗೆ ರೋಡ್ ಶೋ ನಡೆಸಿ ಮತ ಪ್ರಚಾರ ನಡೆಸಿದರು.