ಅಯ್ಯಯ್ಯೋ ಇಲ್ಲಿತನಕವೂ ಪೂರೈಕೆಯಾದ ಕಳಪೆ ಅಕ್ಕಿ!, ನ್ಯಾಯ ಬೆಲೆ ಅಂಗಡಿ ಮುಂದೆ ಧರಣಿ ಕುಳಿತ ಜ‌ನತೆ

ಅರಕಲಗೂಡು: ರಾಜ್ಯದಲ್ಲಿ ಈಗ ಕಳಪೆ ಪಡಿತರ ಅಕ್ಕಿಯದ್ದೇ ಸದ್ದು, ಇಂದು ಪಟ್ಟಣದ ಪೇಟೆ ಬೀದಿ ಮಸೀದಿ ಪಕ್ಕದ ನ್ಯಾಯಬೆಲೆ ಅಂಗಡಿಯಲ್ಲಿ ಕಳಪೆ ಅಕ್ಕಿ ನೀಡಲಾಗುತ್ತಿದೆ ಎಂದು ಆರೋಪಿಸಿ ಬುಧವಾರ ಪಡಿತರದಾರರು ದಿಢೀರ್ ಪ್ರತಿಭಟನೆ ನಡೆಸಿದರು.

ಪಡಿತರದಾರರಿಗೆ ಮುಗ್ಗುಲು ಹಿಡಿದು ಹುಳು ಹತ್ತಿದ ಅಕ್ಕಿಯನ್ನು ನೀಡಲಾಗುತ್ತಿತ್ತು. ಇದನ್ನು ಖಂಡಿಸಿ ಪಡಿತರದಾರರು ನ್ಯಾಯ ಬೆಲೆ ಅಂಗಡಿಯ ಮುಂದೆ ರಸ್ತೆಯಲ್ಲಿ ಧರಣಿ ಕುಳಿತು ಘೋಷಣೆ ಕೂಗಿದರು.

ವಿಷಯ ತಿಳಿದು ಸ್ಥಳಕ್ಕೆ ಧಾವಿಸಿದ ತಹಸೀಲ್ದಾರ್ ವೈ.ಎಂ. ರೇಣುಕುಮಾರ್ ಅಕ್ಕಿ ಪರಿಶೀಲನೆ ನಡೆಸಿದರು. ರೈತರಿಂದ ಬೆಂಬಲ ಬೆಲೆ ಯೋಜನೆಯಡಿ ಪಡೆದ ಅಕ್ಕಿ ಮಳೆಗೆ  ಸಿಲುಕಿ  ಮುಗ್ಗಲು ಬಿದ್ದಿದೆ. ಇದೇ ಅಕ್ಕಿ ಸರಬರಾಜಾಗಿದೆ. ಇದನ್ನು ವಾಪಾಸ್ಸು ಕಳುಹಿಸಿ ಗುಣಮಟ್ಟದ ಅಕ್ಕಿ ತರಿಸಿಕೊಡುವಂತೆ ಆಹಾರ ಇಲಾಖೆ ಅಧಿಕಾರಿ ಮಂಜುನಾಥ್ ಅವರಿಗೆ ಸೂಚಿಸಿದ ನಂತರ ಪಡಿತರದಾರರು ಪ್ರತಿಭಟನೆ ಕೈಬಿಟ್ಟರು.