ಕೊನೆ ಹಂತದಿಂದ ಕೆರೆಗಳನ್ನು ತುಂಬಿಸಿಕೊಂಡು ಬನ್ನಿ ಶಾಸಕ ಸೂಚನೆ

ಅರಕಲಗೂಡು:  ಹೇಮಾವತಿ ಜಲಾಶಯದಿಂದ  ಬಲ ಮೇಲ್ದಂಡೆ  ನಾಲೆಗೆ ನೀರು ಹರಿಸುವ ಕಾರ್ಯಕ್ಕೆ ಶಾಸಕ  ಎ.ಟಿ.ರಾಮಸ್ವಾಮಿ ಶನಿವಾರ  ಚಾಲನೆ ನೀಡಿದರು. 

 ಬಳಿಕ ಮಾತನಾಡಿದ  ಅವರು, ಈ ಬಾರಿ ನೀರು ಸಂಗ್ರಹ  ಉತ್ತಮವಾಗಿರುವ ಕಾರಣ ಮುಂಚಿತವಾಗಿ ನೀರು ಹರಿಸಲಾಗಿದೆ,  ಕಳೆದ ಮೂರು  ವರ್ಷಗಳಿಂದ  ಈ ಕ್ರಮ ನಡೆಸಲಾಗುತ್ತಿದೆ.  ಜಲಾಶಯದ  ಎಡ ಮತ್ತು ಬಲ ದಂಡೆ ನಾಲೆಗಳಿಗಿಂತ ಬಲ ಮೇಲ್ದಂಡೆ ನಾಲೆ ಎತ್ತರದಲ್ಲಿದೆ. ಹೀಗಾಗಿ 15 ದಿನ ಮುಂಚಿತವಾಗಿ ಈ ನಾಲೆಯಲ್ಲಿ ನೀರು ಹರಿಸಲು ಕ್ರಮ ಕೈಗೊಳ್ಳಲಾಗುತ್ತಿದೆ ಎಂದರು. 

 96.8 ಕಿ ಮೀ ಉದ್ದದ ಬಲ ಮೇಲ್ದಂಡೆ ನಾಲೆಯಲ್ಲಿ  907 ಕ್ಯೂಸೆಕ್ಸ್ ನೀರಿನ ಹರಿವಿನ ಸಾಮರ್ಥ್ಯ  ಇದ್ದು, 56 ಸಾವಿರ  ಎಕರೆ ಅಚ್ಚುಕಟ್ಟು ಪ್ರದೇಶ ಹೊಂದಿದೆ.  6 ಸಾವಿರ  ಎಕರೆ ಭತ್ತದ ಬೆಳೆಗೆ  ಹಾಗೂ 50 ಸಾವಿರ ಎಕರೆಯಲ್ಲಿ ಅರೆ ನೀರಾವರಿ  ಬೆಳೆಗಳಿಗೆ ನಿರೊದಗಿಸುವ ಯೋಜನೆ ರೂಪಿಸಲಾಗಿದೆ.  ನಾಲಾ ವ್ಯಾಪ್ತಿಯಲ್ಲಿ 41 ವಿತರಣಾ ನಾಲೆಗಳು ಇದ್ದು 210 ಕೆರೆಗಳಿವೆ.  ಬಲ ಮೇಲ್ದಂಡೆ ನಾಲಾ ವ್ಯಾಪ್ತಿಯಲ್ಲಿ  146, ಅಡಿಕೆ ಬೊಮ್ಮನಹಳ್ಳಿ ಏತ ನೀರಾವರಿ ಯೋಜನೆಯಲ್ಲಿ 25,ಅಲ್ಲಾ ಪಟ್ಟಣ ಏತ ನೀರಾವರಿ ಯೋಜನೆಯಲ್ಲಿ 7,ಹಳ್ಳಿ ಮೈಸೂರು ಏತನೀರಾವರಿ ಯೋಜನೆಯಲ್ಲಿ 32 ಕೆರೆಗಳಿದ್ದು ಇವುಗಳನ್ನು  ತುಂಬಿಸಲು ಕ್ರಮ ಕೈಗೊಳ್ಳಾಗುವುದು ಎಂದರು. 

ನಾಲೆಯ ಆಧುನೀಕರಣ ಕಾಮಗಾರಿ ನಡೆದ ಬಳಿಕ ನೀರಿನ ಹರಿವಿನ ಸಾಮಾರ್ಥ್ಯ ಹೆಚ್ಚಾಗಿದೆ. ವ್ಯಾಪ್ತಿಯ  ಎಲ್ಲ 210 ಕೆರೆಗಳನ್ನು ತುಂಬಿಸಲು ಕ್ರಮ ಕೈಗೊಳ್ಳಬೇಕು. ಮೊದಲ ದಿನ 100 ಕ್ಯೂಸೆಕ್ಸ್ ನೀರು ಹರಿಸಲಾಗಿದ್ದು ಇದನ್ನು ಹಂತ, ಹಂತವಾಗಿ ಏರಿಕೆ ಮಾಡಲಾಗುವುದು. ನಾಲೆಯ ಕೊನೆಯ ಹಂತದ ರೈತರ ಜಮೀನಿಗೂ ನೀರು ಸರಾಗವಾಗಿ ಹರಿಯುವಂತೆ  ಗಮನ ಹರಿಸಲು ಅಧಿಕಾರಿಗಳು ಕ್ರಮ ಕೈಗೊಳ್ಳಬೇಕು, ರೈತರು ನೀರನ್ನು ಪೋಲು ಮಾಡದಂತೆ ವ್ಯವಸ್ಥಿತ ರೀತಿಯಲ್ಲಿ ಬಳಕೆ ಮಾಡಿಕೊಳ್ಳುವ ಮೂಲಕ  ಉತ್ತಮ ಬೆಳೆ ಬೆಳೆಯುವಂತೆ  ಸಲಹೆ ಮಾಡಿದರು. 

 ವಿಜಾಪುರ  ಅರಣ್ಯ ಗ್ರಾಮ ಪಂಚಾಯಿತಿ ಅಧ್ಯಕ್ಷೆ  ಲಲಿತಮ್ಮ, ಹೇಮಾವತಿ ಬಲಮೇಲ್ದಂಡೆ ನಾಲಾ ವಿಭಾಗದ ಕಾರ್ಯಪಾಲಕ  ಎಂಜಿನಿಯರ್ ಜಯಕುಮಾರ್, ತಹಶೀಲ್ದಾರ್ ವೈ.ಎಂ.ರೇಣುಕುಮಾರ್ ಉಪಸ್ಥಿತರಿದ್ದರು.

                            ಸಂಪಾದಕ - ರವಿ