ಪಪಂ ಹಣ ಮನಸ್ಸೋ ಇಚ್ಚೆ ಗುಳುಂ ಅಂತೆ; ಲೂಟಿಯಾಗುತ್ತಿದೆ ಎಂದು ಗುಡುಗಿದ ಉಪಾಧ್ಯಕ್ಷ

ಅರಕಲಗೂಡು: ಪಪಂ ಹಣ ಬೇಕಾಬಿಟ್ಟಿಯಾಗಿ ದುರುಪಯೋಗ ಆಗುತ್ತಿದೆ ಎಂದು ಉಪಾಧ್ಯಕ್ಷ ನಿಖಿಲ್ ಕುಮಾರ್ ದಾಖಲೆ ಪ್ರದರ್ಶಿಸಿ ಆರೋಪಿಸಿದರೆ, ಮತ್ತೊರ್ವ ಸದಸ್ಯ ರಮೇಶ್ ವಾಟಾಳ್ ಅವರು, ಪಟ್ಟಣದಲ್ಲಿ ನೆನಗುದಿಗೆ ಬಿದ್ದಿರುವ ಒಳಚರಂಡಿ ಕಾಮಗಾರಿಯನ್ನು ಪೂರ್ಣಗೊಳಿಸಲು  ಸರ್ಕಾರ ಕೂಡಲೆ ಕ್ರಮ ಕೈಗೊಳ್ಳದಿದ್ದರೆ ಬೆಂಗಳೂರು ವಿಕಾಸ ಸೌಧದ ಮುಂದೆ ಇರುವ ಗಾಂಧಿ ಪ್ರತಿಮೆ ಮುಂದೆ  ಸದಸ್ಯರೆಲ್ಲರೂ ಒಗ್ಗೂಡಿ ಧರಣಿಗೆ ಮುಂದಾಗೋಣ ಇದಕ್ಕೆ ಅಧ್ಯಕ್ಷರೂ ಕೈಜೋಡಿಸಲು ಮುಂದಾಗಬೇಕು ಎಂದು ಒತ್ತಾಯಿಸಿದರು. ಸಭೆ ಗೌಜು ಗದ್ದಲದ ಕಾವೇರಿತ್ತು.

ಪಪಂ ಅಧ್ಯಕ್ಷ ಹೂವಣ್ಣ ಅವರ ಅಧ್ಯಕ್ಷತೆಯಲ್ಲಿ ಸೋಮವಾರ ನಡೆದ ಸಾಮಾನ್ಯ ಸಭೆಯಲ್ಲಿ ಮಾತನಾಡಿ, ಕಳೆದ 5 ವರ್ಷಗಳ ಹಿಂದೆ ಪ್ರಾರಂಭವಾದ ಕಾಮಗಾರಿ ಅರ್ಧಕ್ಕೆ ನಿಂತಿದ್ದು ಪೂರ್ಣಗೊಳಿಸಲು ಕ್ರಮ ವಹಿಸಿಲ್ಲ, ಸರ್ಕಾರವೂ ಈ ಕುರಿತು ಗಮನ ಹರಿಸಿಲ್ಲ. ಜನರು ಮೂಲ ಸೌಕರ್ಯ ವಿಲ್ಲದೆ ತೊಂದರೆ ಅನುಭವಿಸುತ್ತಿದ್ದಾರೆ ಎಂದು ಆಕ್ರೋಶ ವ್ಯಕ್ತಪಡಿಸಿದರು.
ಪಪಂ ಅಧ್ಯಕರು ಅಧಿಕಾರ ವಹಿಸಿಕೊಂಡು 10 ತಿಂಗಖಾಗಿದ್ದರೂ ಪಟ್ಟಣದ ಸಮಗ್ರ  ಅಭಿವೃದ್ಧಿಗೆ ಗಮನ ಹರಿಸದೆ ಕೆಲವೇ ವಾರ್ಡಗಳ  ಅಭಿವೃದ್ಧಿಗೆ ಆಶಕ್ತಿ ವಹಿಸುತ್ತಿದ್ದಾರೆ. ಸ್ವಚ್ಚತೆ, ಬೀದಿದೀಪ, ರಸ್ತೆ ಅಭಿವೃದ್ಧಿ ಮುಮಥಾದ ಮೂಲಬೂತ ಸೌಕರ್ಯಗಳ ವಿಚಾರದಲ್ಲಿ ಯಾವ ಬದಲಾವಣೆಯೂ ಕಂಡುಬರುತ್ತಿಲ್ಲ ಎಂದು ಆರೋಪಿಸಿದರು.

ಅಧ್ಯಕ್ಷ ಹೂವಣ್ಣ ಉತ್ತರಿಸಿ, ಒಳಚರಂಡಿ ವ್ಯವಸ್ಥೆ ಸರಿಪಡಿಸಲು ಶಾಸಕರು ಪ್ರಯತ್ನ ನಡೆಸಿದ್ದಾರೆ. ತ್ಯಾಜ್ಯ ಸಂಗ್ರಹದ ತೊಟ್ಟಿ ನಿರ್ಮಾಣಕ್ಕೆ ಸ್ಥಳ ಗುರುತಿಸುವಂತೆ ಪಪಂ ಸೂಚಿಸಿದ್ದು ನಾಲ್ಕು ಕಡೆ ಜಾಗ ಗುರುತಿಸಿ ಮಂಜೂರಾತಿಗೆ  ಜಿಲ್ಲಾಧಿಕಾರಿಗಳಿಗೆ ಪ್ರಸ್ತಾವನೆ ಸಲ್ಲಿಸಲಾಗಿದೆ. ಹಿಂದೆ ಯಾವ ಕೆಲಸವೂ ನಡೆಯದೆ ಇದ್ದಾಗ ಸುಮ್ಮನೆ ಕುಳಿತಿದ್ದ ನೀವು ಈಗ ಕಾಮಗಾರಿ ನಡೆಯುವ ವೇಳೆ ಪ್ರತಿಭಟನೆಗೆ ಮುಂದಾಗುತ್ತಿದ್ದೀರಿ, ಪಟ್ಟಣದ  ಅಭಿವೃದ್ದಿ ಕುರಿತಂತೆ ತಾವು ಯಾವುದೇ ಪಕ್ಷ ಪಾತ ಮಾಡುತ್ತಿಲ್ಲ ಎಂದು ತಿರುಗೇಟು ನೀಡಿದರು.

ಉಪಾಧ್ಯಕ್ಷ  ನಿಖಿಲ್ ಕುಮಾರ್  ಮಾತನಾಢಿ ಪಟ್ಟಣದ ಹಲವು ಮೂಲ ಭೂತ ಸೌಕರ್ಯಗಳ ಕೊರತೆ ಕುರಿತು ಅಧ್ಯಕ್ಷರಿಗೆ ಹಲವು ಬಾರಿ ಮನವಿ ನೀಡಿದರೂ ಯಾವುದೇ ಕ್ರಮ ಕೈಗೊಂಡಿಲ್ಲ, ಬೀದಿ ದೀಪ, ಬೀಇ ನಾಯಿಗಳ ಹಾವಳಿ, ಸ್ವಚ್ಚತೆ ಮುಂತಾದ ಹಲವು ವಿಷಯಗಳ ಬಗ್ಗೆ
ನಿರ್ಲಕ್ಷಿಸಲಾಗಿದೆ. ಅಭಿವೃದ್ಧಿ ಕಾಮಗಾರಿಗಳ ಕುರಿತು ಸದಸ್ಯರನ್ನು ವಿಶ್ವಾಸಕ್ಜಕೆ ತೆಗೆದುಕೊಳ್ಳದೆ ಏಕಪಕ್ಷಿಯವಾಗಿ ನಿರ್ಧಾರ ಕೈಗೊಳ್ಳಲಾಗುತ್ತಿದೆ.  ಸಭೆಯಲ್ಲಿ ಚರ್ಚಿಸಿ ಅನುಮೋದನೆ ಪಡೆಯದೆ ಹಲವು ಅಭಿವೃದ್ಧಿ ಕಾಮಗಾರಿಗಳಿಗೆ ಪಪಂ ಕಚೇರಿ ಆವರಣದಲ್ಲೆ ಇತ್ತೀಚೆಗೆ ಭೂಮಿ ಪೂಜೆ ನಡೆಸಲಾಗಿದೆ ಎಂದು ಆರೋಪಿಸಿದರು.

ಅನುಮೋದನೆ ಪಡೆಯದೆ  ಪ್ರಾರಂಭಿಸಿರುವ ಕಾಮಗಾರಿಗಳನ್ನು ಕೂಡಲೆ ರದ್ದುಗೊಳಿಸಲು ಕ್ರಮ ಕೈಗೊಳ್ಳಬೇಕು ಹಾಗೂ ಸಭೆಯಲ್ಲಿ ಚರ್ಚಿತವಾಗುವ ವಿಷಯಗಳು ನಡವಳಿಕೆ ಪುಸ್ತಕದಲ್ಲಿ ವ್ಯವಸ್ಥಿತವಾಗಿ ದಾಖಲಾಗುತ್ತಿಲ್ಲ,  ಸಭೆಯಲ್ಲಿ ನಡೆಯುವುದೆ ಒಂದು, ಪುಸ್ತಕದಲ್ಲಿ ದಾಖಲಿಸುತ್ತಿರುವುದೇ ಬೇರೆ ಎಂದು ಸದಸ್ಯ ರಮೇಶ್ ವಾಟಾಳ್ ಆಗ್ರಹಿಸಿದರು. 

ಈ  ಹಿಂದೆ ಸಭೆಯಲ್ಲಿ ಚರ್ಚಿತವಾಗಿರುವ  ವಿಷಯಗಳು ಯಾವರೀತಿ ದಾಖಲು ಮಾಡಲಾಗಿದೆ ಎಂಬುದನ್ನು ಸಭೆಗೆ  ಓದಿ ಹೆಳುವಂತೆ ಸದಸ್ಯ ಅನಿಕೇತನ್  ಪಟ್ಟು ಹಿಡಿದರಲ್ಲದೆ,  ಪಪಂ  ಸಿಬ್ಬಂದಿ ಸದಸ್ಯರಿಗೆ ಯಾವುದೆ ಗೌರವ ನೀಡುತ್ತಿಲ್ಲ ಎಂದು ಕಿಡಿಕಾರಿದರು. ಖರ್ಚು ವೆಚ್ಚಗಳ  ಮಾಹಿತಿಯಲ್ಲಿ ನೀರಿನ ತೆರಿಗೆ ಸಂಗ್ರಹ ಮೂರು ಲಕ್ಷಕ್ಕೆ ಬದಲಾಗಿ ರೂ 30 ಲಕ್ಷ  ಎಂದು ದಾಖಲಿಸಿರುವ  ನಿರ್ಲಕ್ಷ ಬಗ್ಗೆ ತೀವ್ರ ಆಕ್ಷೇಪ ವ್ಯಕ್ತಪಡಿಸಿದರು.

ಸಿಬ್ಬಂದಿ ಈ ವೇಳೆ ಉಡಾಫೆ ಉತ್ತರ ನೀಡಿದ್ದರಿಂದ  ಸಿಟ್ಟಿಗೆದ್ದ  ಅವರು ಈ ಕುರಿತು ನೋಟೀಸ್ ನೀಡಿ ಕ್ರಮಕ್ಕೆ ಆಗ್ರಹಿಸಿದರು. ಸದಸ್ಯರಾದ  ಪ್ರದೀಪ್ ಕುಮಾರ್, ಕೃಷ್ಣಯ್ಯ ದನಿಗೂಡಿಸಿದರು ಈವೇಳೆ ಕೆಲಕಾಲ ಸಭೆಯಲ್ಲಿ ಗದ್ದಲದ ವಾತಾವರಣ ನಿರ್ಮಾಣ ವಾಗಿತ್ತು. ಅಧ್ಯಕ್ಷ ಹೂವಣ್ಣ ಸಿಬ್ಬಂದಿಯನ್ನು ತರಾಟೆಗೆ ತೆಗೆದುಕೊಂಡು ಸಭೆಯಲ್ಲಿ ಸದಸ್ಯರ ಮಾತಿಗೆ ಗೌರವ ನೀಡುವಂತೆ ತಿಳಿಸಿ ವಾತಾವರಣವನ್ನು ತಿಳಿಗೊಳಿಸಿದರು. 

ಸಭೆಯಲ್ಲಿ ಪಪಂ  ವಾಣಿಜ್ಯ ಮಳಿಗೆಗಳಿಗೆ ಸಂಬಂಧಿಸಿದಂತೆ  ಲಾಟರಿ ಮೂಲಕ ಮೀಸಲಾತಿ ನಿಗಧಿ ಗೊಳಿಸಲಾಯಿತು. ಮುಖ್ಯಾಧಿಕಾರಿ ಶಿವಕುಮಾರ್ ಇದ್ದರು.

                       ಸಂಪಾದಕ - ರವಿ